O Goberno local do Concello de Sanxenxo comunicou este martes aos sindicatos e á Consellería de Traballo a súa intención de revisar o convenio laboral que seguirá vixente ata o 31 de marzo cando conclúe o prazo da prórroga.
O concelleiro de Persoal, Marcos Guisasola, trasladoulles aos representantes dos traballadores que a intención do goberno é "realizar unha actualización e revisión dalgúns dos puntos do texto para adaptalo ás necesidades actuais".
A alerta sanitaria obrigou durante o pasado ano a recorrer ao teletraballo nos distintos departamentos municipais, unha situación que, por exemplo, non recolle o actual convenio en vigor.
A partir de agora ábrese un prazo de negociación de 30 días cos sindicatos e antes de finalizar este mes convocarase a primeira comisión negociadora na que se abordarán os artigos que se queren modificar.
Ademais, o Concello abrirá outro proceso de negociación cos sindicatos para abordar as actuais indemnizacións laborais de baixas por enfermidade. A elevada taxa de baixas, un 51,5% por encima da media estatal, rexistrada durante 2019 e 2020 leva ao goberno para revisar a máxima indemnización da cobranza do salario en vigor desde 2018.
"Aínda que non é unha maioría dos traballadores, pero si unha parte significante, o goberno detectou un certo abuso na utilización das baixas", aseguran desde o equipo do alcalde Telmo Martín. "O goberno como o máximo responsable de xestionar o diñeiro do orzamento que procede dos impostos dos veciños de Sanxenxo e, por tanto, ten a obrigación de emendar calquera situación anómala detectada".