A demanda de alumnado nas actividades xeradas pola UNED Sénior, que coordina Rafael Cotelo Pazos, supera as previsións máis optimistas. O curso de bailoterapia que comeza este martes ten xa completada a matrícula nun total de cinco grupos baixo a dirección do profesor de bailes latinos Luciano Ricardo Gomes Dos Santos.
A UNED Sénior en Pontevedra ofrece un espazo ideal para que as persoas maiores de 55 anos continúen aprendendo, sen necesidade de titulación previa, e adaptándose aos seus intereses e ritmo cursando as diversas materias que á súa disposición pon este centro educativo universitario.
Así para este primeiro cuadrimestre, a UNED Sénior en Pontevedra ofrece ademais do curso de Bailoterapia e Bailes Latinos outro baixo o título de "A arte como lexitimación política, relixiosa e social durante os séculos XVII e XVIII. O barroco. Efecto e ilusión"; outro sobre "Historia de Pontevedra (5). Lembrando o pasado, coñecendo o presente" para rematar cun de carácter legal sobre "As herdanzas en Galicia", cun prezo de matrícula por alumno de tan só 50 euros.
As actividades da UNED Sénior son moi variadas, pero as relacionadas coa bailoterapia están a lograr nos últimos tempos una das maiores aceptacións como demostra o seu alto número de matrícula e as exhibicións que se realizan ao finalizar o curso na Praza da Peregrina que levantan gran interese e expectación entre o público en xeral.
Nestes momentos hai 5 grupos formados para realizar esta actividade que combina exercicio físico co gozar do baile, o que non só contribúe á mellora da saúde física, senón tamén á socialización e o benestar emocional dos participantes. A bailoterapia resulta ser unha forma divertida e accesible de manterse activo, fomentando o exercicio a través do movemento e a música.
Xunto a esta actividade, UNED Senior continúa ofrecendo cursos en áreas como cultura xeral, arte, saúde, ciencias sociais e novas tecnoloxías, brindando ao estudantado de todas as idades a oportunidade de manterse activos mental e fisicamente.