A apertura dos novos cines de Pontevedra é inminente. Así se desprende dos movementos que se produciron nas últimas horas. Os empresarios sinalaran recentemente que a súa intención era abrir antes do Nadal, un prazo que parece factible despois de que o Concello de Pontevedra apurase a tramitación administrativa da súa preceptiva licenza de apertura.
Os empresarios que promoven a reapertura dos cines de Vialia, pertencentes a partir de agora a Galicine S.L., mantiveron este mércores unha nova reunión co concelleiro de Urbanismo, Antón Louro, para informarse dos últimos pasos deste trámite legal, que debe recoller o cambio de titularidade en dita actividade.
Tras recibir fai uns días o informe positivo relativo aos aspectos de seguridade, evacuación e aforo, trasladóuselles verbalmente que o último informe que lles falta, que debe emitir o servizo municipal de inxeniería, tamén será favorable, ao non terse detectado ningunha deficiencia nas súas instalacións.
Ademais, Louro trasladoulles que se intentará convocar unha Xunta de Goberno extraordinaria para este venres para aprobar a concesión da licenza de apertura e o cambio de titularidade, o que trala preceptiva comunicación aos interesados, permitiría a Galicine S.L. comezar a súa actividade nos cines de Vialia, que manterán os seus oito salas pero equipadas coas últimas tecnoloxías no sector, tralas reformas realizadas nos últimos meses.
En todo caso, todos os detalles sobre este proxecto e os prazos que manexan tralo visto bo municipal coñeceranse nunha rolda de prensa que o empresario Severino Pato, dono de Multicines Cinexpo, o nome comercial baixo o que se explotarán os cines pontevedreses, dará este xoves 19 de decembro nas instalacións de Vialia.
A páxina web de Galicine, o grupo empresarial no que se integra Cinexpo, recolle xa un apartado dedicado aos cines de Vialia. Nel apenas se ofrece información adicional, salvo un teléfono para a venda de entradas e un aviso no que se informa de que, inicialmente, o día do espectador, con entradas a prezos rebaixados, sería o luns.
Coa reapertura dos cines de Vialia, Pontevedra recuperará as oito salas de cine que perdeu hai seis meses. Cinebox, empresa adxudicataria das instalacións, proxectaba as súas últimas películas o pasado 2 de xuño.