O Centro Sur de Campolongo albergará unha residencia para persoas con parálise cerebral

Pontevedra
21 de decembro 2020

Ata trinta e dúas prazas para persoas con parálise cerebral terá a residencia que o Concello de Pontevedra habilitará no Centro Sur de Campolongo. Será un equipamento que xestionará a asociación Amencer-Aspace

Centro Sur en Campolongo
Centro Sur en Campolongo / Mónica Patxot

Ata trinta e dúas prazas para persoas con parálise cerebral terá a residencia que o Concello de Pontevedra habilitará no Centro Sur de Campolongo. Será un equipamento que xestionará a asociación Amencer-Aspace.

Neste proxecto, que segundo o goberno municipal é un dos máis ambiciosos deste mandato, investiranse 1,54 millóns de euros que serán financiados a través da estratexia EDUSI dos fondos europeos FEDER.

A portavoz do executivo local, Anabel Gulías, informou este luns do inicio do procedemento de contratación da reforma do Centro Sur, que terá un prazo de execución de oito meses. O Concello prevé que a residencia se poida inaugurar en 2022.

A edil recoñeceu que a tramitación deste proxecto será complexa, xa que require dun permiso sectorial da Xunta de Galicia tanto para a súa construción como para o seu posterior acondicionamento.

O Concello deberá tamén iniciar os trámites para aprobar a concesión para que Amencer-Aspace poida facerse cargo desta residencia que, nun principio, será por 30 anos.

A obra prevé acondicionar dúas das súas plantas, a primeira e a segunda, para esta residencia, que terá unha entrada independente do resto do edificio. 

Ademais, rehabilitarase toda a estrutura do inmoble para deixalo preparado para que, nunha segunda fase, se aborde o acondicionamento da terceira planta, que estará destinada a un centro de día para as asociacións Amizade e Cogami.

O Centro Sur manterá os usos actuais na súa planta e no seu soto, que están cedidas a colectivos como o Fondo Galego de Cooperación, a Coral Polifónica, o Instituto Galego de Análise e Documentación Internacional (IGADI) ou as asociacións veciñais Salcedo Sur e Campolongo.