O centro histórico e a Senda do Lérez son os espazos da cidade preferidos polos pontevedreses segundo reflicte unha enquisa elaborada dentro do proxecto ‘Redeverde’, de renaturalización, mellora da biodiversidade e incremento da resiliencia urbana de Pontevedra.
O concelleiro de Servizos Municipais e Urbanos, César Mosquera deu a coñecer este martes o resultado desta consulta a cidadá incluída neste proxecto ‘Redeverde’, que é unha iniciativa financiada pola Fundación Biodiversidade, do Ministerio de Medio Ambiente, Medio Rural e Marino que ten como socios principais ao Concello de Pontevedra e a Universidade da Coruña.
O proxecto pretende unha evolución do actual modelo de transformación urbana de Pontevedra impulsando a dimensión ambiental, mediante a renaturalización do espazo urbano, incrementando a biodiversidade e recuperando a conectividade do espazo marítimo e fluvial.
Dentro desta estratexia elaborouse unha enquisa na que se consultou á cidadanía pontevedresa sobre as súas preferencias de espazos na Boa Vila e o uso dos espazos verdes, entre outros datos.
Así, como resultado comprobouse que o Centro histórico é o espazo público preferido pola cidadanía de Pontevedra. Aparece mencionado por un 31% das persoas entrevistadas. En segundo lugar, aparecen case empatados, en torno 15-20%, catro enclaves: a Praza da Peregrina, as rúas peonís do centro urbano, a Praza da Ferrería e o Paseo pola Senda do Lérez.
Ao referirse especificamente a espazos verdes, a hexemonía da Senda do Lérez mantense, mencionada por case a metade da mostra. Os outros referentes relevantes son a Alameda (30%), a Xunqueira de Alba (24%), o Pazo de Lourizán (16%), o Parque das Palmeiras (13%), a Praza de Barcelos (11%) e o Parque do Pontillón (10%).
Para o 98,8% da mostra, a media é de 1 visita cada 2,1 días; o que quere dicir que cada cidadán, en media, usa algún espazo verde de Pontevedra 173,8 días ao ano.
Case un 50% da poboación visita ou transita por un espazo verde a diario e un 80% fano, como mínimo, unha vez á semana. Un 45% da mostra pasa nalgún espazo verde 30 minutos ou máis.
A cidade, en xeral, sae ben parada, en canto a avaliación polos seus residentes. Cunha puntuación de 7,3, sobre 10. Valóranse positivamente aspectos como a peonalización, a veciñanza e a seguridade, mentres que están peor puntuados: a mobilidade, os espazos verdes e o estado das rúas.