A área sanitaria de Pontevedra e O Salnes manterá a actividade asistencial no centro de saúde de Seixo, en Marín, segundo quedou patente nun encontro mantido este martes entre a Xerencia da área sanitaria, o Concello de Marín, os profesionais médicos do centro e representantes veciñais desta localidade.
A Administración Sanitaria Pública galega asegura, deste xeito, a continuidade asistencial no centro de Atención Primaria desta parroquia marinense ante a previsión de xubilación dun dos seus facultativos de Medicina Familiar e Comunitaria. Durante o encontro sinalouse que este centro de saúde dispón de dúas prazas de Medicina Familiar e Comunitaria que non se contempla amortizar e que seguirán prestando servizo asistencial.
Non obstante, dada a actual escaseza de profesionais substitutos para cubrir dita vindeira xubilación, o Servizo Galego de Saúde comprometeuse a buscar alternativas administrativas que poidan cubrir dita ausencia mentres non se pode efectuar a cobertura con estabilidade.
A reunión mantida en Seixo tamén analizou xunto cos representantes veciñais esta circunstancia, que se engade á chegada do período estival, momento no que os profesionais aproveitan para tomar os seus períodos vacacionais, polo que a planificación de coberturas complícase durante o verán posto que, ademáis da escaseza de médicos de familia, nesta etapa descende por vacacións o cadro de efectivos que se reduce nun 25 por cento.