A dragaxe da Ría de Pontevedra longamente demandada deberá agardar ata o ano 2018. Xa era unha noticia anunciada nas últimas semanas, pero este martes recibiu a confirmación no Parlamento de Galicia durante o debate na comisión de Ordenación do Territorio da proposición non de lei presentada polo BNG para reclamar unha partida do orzamento do 2017 para licitar o proxecto.
O deputado nacionalista Luís Bará reclamou que se executara este ano "nunha única fase", pero o portavoz de Medio Ambiente do PP, Martín Fernández Prado, asegurou que Portos de Galicia axilizará ao máximo a aprobación do proxecto para poder licitar as obras durante o ano 2018.
Bará lembrou que despois de seis anos de tramitación sen que o proxecto se execute estanse a producir "graves consecuencias" para o sector do mar ao impedir a rexeneración e recuperación dos bancos marisqueiros e, de maneira especial, á actividade marisqueira a flote. O BNG comparte a preocupación dos sectores marisqueiro e da navegación deportiva ante o retraso acumulado do proxecto.
A proposta do BNG recibiu o apoio do PSdeG-PSOE e o rexeitamento de En Marea e o PP. A pesar de que non logrou sacala adiante, Bará defende a súa necesidade para que non queden os barcos en seco e sostén que, pese á complexidade da obra e controis ambientais, "o retraso das obras non é xustificado".
O nacionalista pediu celeridade para o inicio do proxecto unha vez que Portos de Galicia mudou de actitude, pero o 'popular' non fixo caso á súa petición. Martín Fernández asegurou que o PP é "plenamente consciente" da necesidade de solventar os problemas de calado na Ría de Pontevedra, pero a administración "non pode incumprir nin obviar ningún dos trámites obrigatorios que se prevén na lexislación ambiental para estas actuacións
Ao respecto, lembrou que o Diario Oficial de Galicia publicou o pasado 11 de xaneiro a resolución pola que se somete a información pública o anteproxecto e o estudo de impacto ambiental da dragaxe da Ría de Pontevedra e a desembocadura do río Lérez e neste momento estanse a recibir as alegacións, de modo que "o tempo de resposta variará en función do número de alegacións que se acheguen e da dificultade da resposta".
Ademais, asegurou que Portos de Galicia está en contacto permanente cos responsables do Concello de Pontevedra e coa Confraría de Pescadores, mantendo reunións informativas nas que da conta do estado da tramitación e recolle as súas propostas para acadar os mellores resultados e facer posible no futuro as actividades marisqueiras nesta zona.