Para que a folga xeral do 14 de novembro sexa un éxito os sindicatos piden aos cidadáns non só que non vaian traballar durante esa xornada senón que eviten calquera consumo: "nin comprar pan nin tomar un café". Tres representantes das centrais maioritarias, Carlos Búa de CC.OO, Marcos Cadórniga de UGT e Carlos Esperón de UGT explicaron, ademais, que van iniciar actuacións de inmediato para que a patronal do sector do comercio se sente a negociar os convenios colectivos.
Afirman que ao redor de 40.000 traballadores deste sector na provincia de Pontevedra están afectados pola parálise que sofre a negociación dunhadecena de convenios colectivos cuxa vixencia está esgotada e prorrogada.
Estes dirixentes advirten de que se en xullo non están actualizados estes convenios, os traballadores sufrirán unhas consecuencias negativas nos seus salarios, xornadas e dereitos sociais.
Indicaron que as grandes multinacionais da alimentación gañaron diñeiro coa crise grazas ao incremento de vendas en marcas brancas e, non obstante, non realizaron ningún movemento para sentarse a negociar os convenios. Se pasados nove meses non hai acordo, a patronal podería aplicar o salario mínimo interprofesional, tal e como establece a Reforma Laboral.
Desta forma, anuncian que a partir do martes 13 comezarán a realizar protestas "sorpresa" contra grandes grupos galegos da alimentación e citaron a Gadis e a Froiz, ademais de Inditex sinalando que o sector téxtil carece dun interlocutor por parte da patronal para negociar.
Os sindicatos reclaman aos traballadores que secunden a folga do mércores 14 e que se evite calquera tipo de actividade comercial durante esa xornada.