O PP non expulsará a Gonzalo Durán, alcalde de Vilanova de Arousa, tras ser condenado por un xulgado por chamar "chacha para todo" á presidenta da Deputación, Carmela Silva. Iso si, Alberto Núñez Feijóo considera que non foi unha expresión "correcta".
Pero, máis aló dese feito, Núñez Feijóo asegurou que "se hai un partido que insulta, falta ao respecto e difama de forma constante e continua" aos militantes do PP son os responsables do PSOE en Pontevedra e Vigo.
"Se o PP tivese que expedientar a calquera político na provincia de Pontevedra por expresións contra os seus adversarios políticos, o PSOE probablemente quedaría sen responsables políticos", engadiu o presidente dos populares galegos.
Tras apuntar que para demostrar iso "me remito ás hemerotecas", Feijóo apuntou que "veremos en que queda o recurso" presentado polo alcalde de Vilanova contra a sentenza que lle condenou como autor dun delito leve de falta de respecto á autoridade.
FEIJÓO PRESENTA OS AVAIS PARA O CONGRESO DO PPDEG
Núñez Feijóo fixo estas declaracións tras depositar os 6.119 avais que necesitaba para presentarse á reelección como líder do PP en Galicia no congreso que se celebrará en xullo na cidade de Pontevedra.
Fíxoo no último día de prazo e sen que, polo menos de momento, presentouse ningún outro aspirante.
"Mentiría se dixese que nos presentamos para presidir o partido; presentámonos para que o PP siga gañando eleccións. Preséntome de forma especial para que o PP siga gañando presenza nas institucións provinciais e locais", asegurou o presidente actual.
O dirixente do PP reiterou que "me presento para liderar un partido, para nada máis" e apuntou que nun momento como o actual "sería unha irresponsabilidade" non tentar liderar de novo o partido e "refuxiarse en exclusiva" na presidencia da Xunta.
Segundo Núñez Feijóo, hai que estar "ás duras e ás maduras" e por iso considera que non sería útil para Galicia "romper o liderado" do partido. Por agora, iso si, non aclarou se se presentará ás eleccións autonómicas de 2024 porque "do futuro falarase no futuro".