O Concello de Ribadumia presentou no Salón de Plenos unha ampla programación de actividades para conmemorar o 25 de novembro, Día Internacional da Eliminación da Violencia Contra a Muller.
As actividades comezarán o 15 de novembro no Auditorio municipal co obradoiro 'Comunícate con confianza e seguridade', organizado en colaboración co Centro de Información á Muller (CIM) do Salnés.
O 20 de novembro, inaugurarase a exposición 'Á violencia de xénero dille non', aberta ata o 4 de decembro.
O día seguinte, 21 de novembro, ofrecerase o obradoiro 'O poder das redes sociais'.
O domingo 24 de novembro, a programación inclúe a andaina #NonEstásSoa, que partirá da praza do Concello ás 10:30 horas, percorrendo a beira do río Umia ata Cabanelas.
Pola tarde, o Auditorio acollerá a obra de teatro 'Elas' de Vero Rilo ás 19:00 horas.
O 25 de novembro, data central da conmemoración, realizarase a lectura do manifesto institucional no Auditorio, acompañada dunha actuación musical.
O 26 de novembro, na Casa do Concello, presentarase o I Plan de Igualdade, que establece medidas para promover unha sociedade igualitaria e libre de violencia cara á muller.
A programación continúa o 27 de novembro cunha xornada de formación do Plan Corresponsables, organizada pola Federación pola Igualdade das Mulleres da Provincia de Pontevedra.
O 29 de novembro, o CIM do Salnés ofrecerá o obradoiro 'Enfrontando a violencia de xénero, construíndo respostas e reaccións dende o rural' no anfiteatro do Auditorio.
Finalmente, o 30 de novembro, Xiana Vilas impartirá un obradoiro de danza contemporánea, co obxectivo de promover a igualdade a través da danza, fomentando a autoestima e a sororidade.
