Que a posibilidade de que chova non impida que Pontevedra goce dunha nova Feira Franca "e que poidamos ter unha gran festa". Ese é o desexo do alcalde, Miguel Anxo Fernández Lores, que confirmou que os preparativos para o gran día avanzan a bo ritmo.
Pontevedra agarda unha participación multitudinaria na XXIII edición da Feira Franca, que terá o seu espectáculo inaugural na Ferrería este venres 6 de setembro.
Tras el, a cidade regresará á Idade Media durante todo o sábado 7, con case trescentas mesas para xantar polas rúas e prazas do centro histórico, entre as autorizadas para particulares e para a hostalería. "É unha festa totalmente consolidada", destacou Fernández Lores.
"Estamos preto dunha data que toda a veciñanza de Pontevedra agarda, así como tamén moitísima xente da contorna que se achega a gozar dela", subliñou o rexedor, que celebra o traballo "impresionante" de todos os colectivos que colaboran coa festa.
Recordou que o éxito da Feira Franca é que "non é unha festa que se lle encarga a unha empresa, é unha festa que facemos entre todos e todas", na que é clave a implicación da cidadanía, que fixo súa esta celebración desde o primeiro ano.
Sobre a choiva, o alcalde agarda non ter que suspender ningunha das actividades, pero en todo caso esperarase ata o último minuto para ver se é posible ou non a súa realización.
"Ningunha Feira Franca foi cancelada pola choiva", advertiu Miguel Anxo Fernández Lores, que recomenda que no caso de que caian algunhas gotas "haberá que coller o paraugas medieval".
Iso si, non pola choiva pero si por outra incidencia, este ano non haberá a tradicional exhibición de cetrería. Tal e como determinou a Xunta de Galicia, o aviso de gripe aviaria impedirá que poidan voar os falcóns que amenizaban a festa en Montero Ríos.
O edil de Festas, Demetrio Gómez, avanzou ademais que a programación deste ano estará marcada por unha maior ambientación musical na rúa, xa que recordou que a Feira Franca deste ano está dedicada á xograría.