Oito grupos participaron este mércores pola tarde no desfile infantil do Enterriño da Sardiña, unha das citas sinaladas do Entroido de Bueu, que desafiou á chuvia para encher de ledicia as rúas da vila.
Así, entre asociacións de nais e pais da vila e diversos colectivos, participaron a ANPA A Pedra, a ANPA Alborada do Virxe Milagrosa, a ANPA Torre Cela, a ANPA Cabo Udra de Beluso, a ANPA Pichirilo da Galiña Azul, a Escola Infantil Tranvía e os grupos Pandy Panda e Los ochenteros.
O desfile arrancou dende a Praza Massó ás cinco da tarde e percorreu as rúas Montero Ríos, Francisco Escáneo, Pazos Fontenla, Johan Carballeira, con remate na carpa de As Lagoas.
Alí tivo lugar a entrega de diplomas aos participantes e a desfeita da sardiña, que este ano foi elaborada novamente con globos por parte de Barafunda.
Carmen García, concelleira de cultura, destacou a multitudinaria asistencia a este desfile e agradeceu a todos os grupos a súa implicación para manter viva a ilusión dos máis pequenos e pequenas neste día.
O seguinte desfile será o do Paxaro de Mal Agoiro, que está previsto para este domingo, aínda que dende a organización se valorará adialo debido ao mal tempo.
A decisión sobre esta cita anunciarase nos próximos días.