Unha muller de 95 anos faleceu tras ser atropelada onte á noite no centro urbano de Cuntis, á altura da piscina municipal, mentres cruzaba un paso de peóns.
O accidente produciuse sobre as oito e media da tarde, segundo informou o 112 Galicia.
A vítima, que vivía nas inmediacións, cruzaba a estrada cando un condutor, que deu negativo nas probas de alcoholemia, arroiouna.
A muller resultou gravemente ferida no atropelo. Sufriu un forte golpe na cabeza e lesións nun brazo. Foi trasladada nunha ambulancia medicalizada do 061 ao Hospital Montecelo de Pontevedra, onde faleceu horas despois.
Ata o lugar trasladáronse efectivos do servizo de emerxencias de Cuntis e axentes da Garda Civil, que se fixeron cargo da investigación de accidente.
No momento do atropelo había pouca visibilidade na zona como consecuencia da falta de luz e das choivas que caían nese momento.
A falecida era a avoa do alcalde de Moraña, Sito Gómez, que residía en Cuntis.