O programa 'Verán na Rúa' que dinamizou Bueu durante este verán chegou ao seu fin e, co remate, tamén chega a valoración. A Concellería de Cultura de Bueu fai un balance "moi positivo".
Este programa combinou espectáculos para toda a familia e cinema nas semanas de agosto e, segundo informan desde o Concello, tivo "moi boa asistencia" en todas as actividades, especialmente nos espectáculos escénicos dos martes na Praza Massó, con máis de douscentos asistentes.
O cinema na rúa chegou a todas as parroquias da vila e cumpriu así o seu obxectivo de ofrecer alternativas de lecer para as familias durante o verán.
Ademais, desde finais de xullo o Concello desenvolveu, xunto ao grupo 'O Mar por Diante', o ciclo 'Tempo de Lecer', que rexistrou unha media de 150 asistentes por sesión e que achegou a diversos aspectos artísticos da vila.