O Pleno do Concello de Campo Lameiro gardou un minuto de silencio en lembranza de Julio Sayáns, quen fora alcalde deste municipio durante 36 anos e que faleceu recentemente.
Os concelleiros presentes puxéronse en pé e, despois de gardar respectuosamente silencio, remataron o acto de homenaxe póstuma cun forte aplauso.
Na sesión plenaria, a Corporación Municipal aprobou a concesión de unha axuda á natalidade para favorecer o empadroamento aplicando a ordenanza vixente que prevé unha subvención de 900 euros en dous anos (450 euros cada ano por un máximo de dous) polo primeiro fillo; 1.100 polo segundo (550 durante os dous anos de vigor da axuda); 1.300 polo terceiro (650 cada ano) e 1.500 polo cuarto (750 por ano) e seguintes.
Ademais, aprobáronse os días festivos para o vindeiro ano que serán, como viña sendo habitual, o 13 de xuño, San Antón, e 29 de setembro, San Miguel.