Memoria e democracia únense para celebrar 46 anos de Constitución

Nun emotivo acto celebrado este venres na Subdelegación do Goberno de Pontevedra, con motivo do Día da Constitución, o subdelegado Abel Losada alertou sobre os riscos que ameazan á democracia española, facendo un chamamento a defender o espírito de consenso que deu orixe á Carta Magna fai 46 anos.

Baixo a lema 'Memoria e Democracia', o evento contou coa participación especial da Asociación de Familiares de Enfermos de Alzhéimer (AFAPO), establecendo un poderoso paralelismo entre a perda de memoria individual e o risco de esquecemento colectivo dos valores democráticos.

"Aos seus 46 anos, a que foi nova Democracia española peitea cada vez máis canas", sinalou Losada, quen advertiu sobre a aparición de "negros nuboeiros contra os que non hai avisos meteorolóxicos, pero contra os que si debe haber avisos políticos".

O subdelegado foi especialmente crítico co que denominou "aquelarre negacionista" celebrado recentemente no Senado, onde se cuestionaron dereitos fundamentais.

Durante o acto, membros de AFAPO protagonizaron unha emotiva lectura de dez artigos constitucionais relacionados coa atención á discapacidade e os dereitos sociais.

José Manuel Fontenla, presidente de AFAPO, aproveitou a ocasión para destacar o papel do asociacionismo na creación da única rede pública española de centros de día especializados en alzhéimer en Galicia.

Losada, quen se definiu como membro da "xeración bisagra" que viviu a transición do franquismo á democracia, comprometeuse a dedicar as súas enerxías a "transmitir aos mozos que a Democracia é o aire que respiran, o único aire respirable".

Durante a súa intervención citou o encontro entre Miquel Roca e Manuel Fraga, nas antípodas polítcias, na mesa para crear a Constitución, destacando o clima de encontro que se rexistrou para a elaboración da Carta Magna. Tamén lembrou á cantautora María Ostiz naquel período de transición.

O evento, que contou coa participación da Banda de Música da Escola Naval e a escritora Carmen Quinteiro, reuniu a numerosas autoridades das administracións estatal, autonómica e local, simbolizando a unidade institucional na defensa dos valores constitucionais.