O deputado socialista por Pontevedra Guillermo Meijón denuncia que o Ministerio de Defensa "négase a concretar cal é a situación presente e de futuro próximo da Illa de Tambo na Ría de Pontevedra" e anuncia que o grupo socialista rexistrará unha nova batería de preguntas para que o Goberno e, singularmente, o Ministerio de Agricultura teñan que contestar dunha forma concreta sobre o destino final que pretenden darlle á Illa de Tambo.
Quere saber tamén se esta illa pasará a formar parte do Parque Nacional das Illas Atlánticas, que consecuencias podería conlevar esta decisión para a pesca na zona na que se deberían salvagardar os usos tradicionais e se manteñen conversacións coa Xunta de Galicia sobre esta cuestión.
Meijón fai esta denuncia tras recibir unha resposta do Goberno ás súas iniciativas parlamentarias presentadas o pasado mes de novembro no Congreso. O deputado socialista chamaba a atención sobre o abandono do Ministerio de Defensa sobre a Illa de Tambo e preguntaba sobre a inclusión desta illa no Parque Nacional das Illas Atlánticas, pero na súa resposta, segun Meijón, o único dato que aporta o Goberno é unha vaga referencia a xestións iniciadas ante o Ministerio de Agricultura, Alimentación e Medio Ambiente para que este organismo se faga cargo da xestión e control da totalidade da illa, pero sen aportar ningún dato sobre o contido expreso de tales xestións nin un calendario que permita facer unha previsión temporal de cando finalizarán as mesmas.
Respecto diso, critica que o Goberno tampouco fai ningunha referencia á posibilidade de incluír a Illa de Tambo no Parque Nacional das Illas Atlánticas e limítase a unha simple alusión a que poderían estudar calquera iniciativa suscitada por institucións ou administracións para darlle un uso que permita a súa conservación.
Para Meijón, "isto non deixa de ser unha argumentación que alimenta a sospeita de que as negociacións co Ministerio de Agricultura van para longo e evidencian que desde Defensa, nunca pretenderon tomar en serio as distintas peticións e propostas que se realizaron por distintos colectivos e administracións respecto da situación e futuro da Illa de Tambo".
"Polo que se ve, desde o Ministerio de Defensa están moi cómodos cunha situación na Illa de Tambo que, segundo a súa resposta, non conta xa con uso militar e limita as súas actuacións á vixilancia e prohibición de tránsitos", indica. Ademais, sinala que o feito de que o Goberno non aporte ningún dato cuantificable sobre os supostos labores de mantemento nos montes e camiños "agudiza a sospeita de que, de habelos, estes limítanse ao mínimo e non bastan para a óptima conservación do patrimonio natural e cultural da illa, o que redundará no seu deterioramento".