A choiva respectou á comitiva real que, sobre o seis da tarde, percorreu as rúas da Boa Vila. Os paraugas só fixeron falta nesta ocasión para capturar máis caramelos.
Nos primeiros 200 metros de percorrido a Cabalgata non tivo música nin ruído para adaptarse aos menores con trastorno de espectro autista (TEA).
Na comitiva para a Cabalgata dos Reis Magos 2025 participou a Policía Local que ía encabezando a marcha xunto ao camión-escaleira de Bombeiros. A continuación desfilou a Banda de Música de Pontevedra, algún dos seus integrantes con chubasquero, e seguidamente chegou a primeira carroza de Alicia no País das Marabillas.
Logo pasaron a Charanga Airiños de San Martiño e os "Coellos de Nadal" de Rivel Animación seguidos de "As árbores de Nadal" da compañía Pablo Méndez Performance.
Foi a quenda entón da "Funky Funky Troula" antes de que chegase a Carroza de Bambi.
Máis animación con "A galiña dos ovos de ouro", de Art-Monium, seguida de Barafunda coa súa "Pomba da Paz" e dos "Trasnos vermellos", de Rivel.
Os Gaiteiros das Rías Baixas abriron o paso á Carroza Inside Out e aos camelos da Festa Escénica, seguidos do grupo folclórico "Pola vila". E máis animación co grupo Troula que trouxo a "Benito e Rufina" e o grupo Art-Monium cos seus "Carboeiros".
O primeiro Rei Mago en aparecer foi Melchor coa súa gran carroza. Detrás del desfilou Troula con "A luz do camiño", Barafunda con "Camelos", Art-Monium con "Unicornio e familia" e os "Soldados de chumbo", de Pablo Méndez.
E chegou a carroza do Rei Gaspar. A continuación o desfile dos de Algures, Art-Monium coa "Dragoada", Rivel Animación cos "Bonecos de neve" e a Hípica Celta. Pechando a Cabalgata desfilou a carroza do Rei Baltasar.
