Andrea Estévez Fernández e César Álvarez García esperaban o seu primeiro fillo para o día de Reis, pero o 31 de decembro ás sete da tarde ela púxose de parto e, tras un nacemento "rapidísimo" no Hospital Provincial, adiantouse e acabou converténdose no primeiro bebé nado en Galicia en 2025.
Eran as 00.17 horas deste mércores 1 de xaneiro cando naceu no Hospital Provincial de Pontevedra o pequeno Mauro Estévez Álvarez.
Chámase Mauro tras un longo proceso de procura de nome -"non eramos capaces de tomar unha decisión", recoñecen-. Finalmente, decantáronse por este porque lles pareceu "moi bonito" e "moi doce" e porque buscaban un nome clásico, escapando dos máis modernos que se adoitan pór na actualidade. Ademais, están contentos de contribuír a que perdure, pois "parece que se está perdendo".
Non había ningún Mauro até agora na familia, na que é o primeiro fillo, primeiro neto e primeiro sobriño por parte de nai, pero xa ten dous curmáns por parte de pai, de 5 e 8 anos, que lle regalaron o boneco co seu nome que o acompañou desde a súa chegada ao berce do hospital e que están "a desexar coñecelo".
En canto aos apelidos, leva primeiro o da súa nai e despois o do seu pai. Foi "por sorteo", pois os apelidos de ambos son "comúns" e decidiron botalo a sortes.
Ao ser o primeiro bebé galego do ano, a expectación mediática invadiu a habitación desta familia pontevedresa no Provincial. Pasaran pouco máis de doce horas desde o parto cando unha nube de cámaras e flashes empezou a retratar a Mauro.
A nai recoñeceu estar "súper ben", moi contenta tras un "embarazo marabilloso" e un parto "visto e non visto". Algo que non entraba nos seus plans dado que é nai primeiriza.
"Ninguén contaba que iso puidese pasar e cando nos demos conta, case non podía nin porme a epidural", relata. Ingresou ás sete da tarde e ás 23.45 pareceu que Mauro saía, pero finalmente resistiuse "un pelín". Xusto cando a cambiaron desde a cama de hospitalización á do paritorio, deron as doce.
Acabou nacendo ás 00.17 e a casualidade fixo que en ningún hospital galego nacese antes ningún bebé. "Convertémonos nos primeiros do ano e nin contabamos", recoñecen, sobre todo, porque esperaban ao pequeno Mauro para o día 6.
Cando souberon que nacería en Reis, pensaron que non lles gustaba o día porque tiña "moito trafego", pero finalmente o trafego viviuse igualmente, en forma de medios de comunicación.
Cando tocaba tomar as uvas, eles estaban coa matrona, a xinecóloga e todo o persoal do Hospital Provincial, que "se portaron estupendamente connosco". Agradecen "un trato estupendo" e non lamentan quedar sen badaladas, pois "mereceu a pena".
Os pais están "moi contentos" e o neno, "moi tranquilo". Pesou 3,060 quilos, mediu 47 centímetros e o seu pai destaca orgulloso que puido presenciar o parto e cortar o cordón umbilical.
Ningún esquecerá este día no que se converteron en pais e a súa fotografía chegou a todos os medios de comunicación.
Agora xa pensan na súa nova vida, que estará en Pontevedra. Ela ten 37 anos e é natural de Ponteareas. El ten 38 e procede de Salvaterra de Miño. Pero desde 2013 son "pontevedreses de adopción", pois chegaron á cidade por traballo e quedaron. Ela é a arquitecta municipal da Lama e el director da oficina do grupo Isonor en Pontevedra.
O pequeno Mauro será "pontevedrés de cepa", pois naceu e empadroarase na cidade. Ademais, lembra a súa nai que ten "un nome moi pontevedrés", en alusió ao barrio de San Mauro.
