O Instituto Nacional de Estatística (INE) concluíu coa revisión dos padróns municipais de todos os concellos españois, fixando a poboación oficial de todos eles con data de 1 de xaneiro de 2023. Será o valor de referencia para todo o ano 2024.
Dentro da área de influencia de Pontevedra, tres son os municipios que rexistran un maior crecemento con respecto ao ano anterior. Son Marín, Sanxenxo e Soutomaior.
Marín sitúase oficialmente nos 24.197 habitantes. Son 163 máis que en 2022. Rompe así unha tendencia que se rexistraba desde hai anos. Iso si, aínda está lonxe dos 26.190 habitantes que a vila tiña en 2007, a cifra máis alta de toda a serie histórica.
En Sanxenxo, pola súa banda, achéganse á barreira das 18.000 persoas censadas. quedan 17.854, é dicir, 94 habitantes máis que o ano anterior. No seu caso, é a súa sexta subida consecutiva e alcanza o seu máximo histórico de residentes, fixado nos 17.760 de 2022.
O terceiro dos municipios con maior saúde demográfica entre 2022 e 2023 foi Soutomaior. No seu caso son 60 habitantes máis, o que lle fai crecer ata os 7.603 residentes. Leva sete anos crecendo en poboación. Os 7.543 de 2022 era o seu teito actual.
Pero estes tres municipios non son os únicos que aumentaron os seus residentes, segundo o INE. O resto, iso si, fano dunha forma moito menos acusada.
Así, creceron en poboación no último ano revisado os municipios de Vilagarcía de Arousa (37.689, +22), A Lama (2.520, +21), Poio (17.297, +19), O Grove (10.828, +19), Barro (3.651, +14), Cambados (13.681, +10) e Campo Lameiro (1.723, +2).