O Concello de Marín quere que a vila mariñeira pase a ser unha cidade intelixente, as coñecidas como Smart City, e xa empezou o camiño para logralo coa estratexia DUSI Marín 2020, cofinanciada nun 80% co Fondo Europeo de Desenvolvemento Rexional (FEDER) da Unión Europea.
O modelo que buscan implantar pasa por mellorar a calidade urbana e a calidade de vida da poboación marinense e, ao mesmo tempo, a funcionalidade e a organización do sistema urbano da cidade.
Dentro dos obxectivos deste plan está a idea de facer de Marín unha cidade intelixente a través da mellora económica e a competitividade onde se englobarían ideas como favorecer a administración electrónica e dos mecanismos de participación e transparencia ou a conversión da vila nun territorio smart, centrado en ideas como o turismo ou a mobilidade sostible.
Dentro das medidas que se están a adoptar para facer de Marín unha Smart City englóbase a posta en marcha nas últimas semanas do sistema de consulta dixital da situación en tempo real do aforo das praias, así como a colocación dunha gran pantalla LED informativa na contorna da praza de España, na que non só se envorcará a información relativa ás praias, senón tamén toda a información de servizo que poida ser de utilidade para a cidadanía.
A estratexia DUSI Marín 2020 tamén ten como obxectivo a dinamización económica, social e cultural da localidade. Seguindo a filosofía de traballar nunha vila conectada e dixitalizada, adaptada aos novos tempos, o Concello lanzou a plataforma dixital Marín en Rede, un espazo no que posicionar a economía local no mundo on line, onde as oportunidades de xeración de riqueza e de movemento económico son moi grandes.