Os amantes dos videoxogos e dos ESports teñen unha cita ineludible en Marín esta ponte de decembro.
A cuarta edición do Marín Gaming, organizado por Lua Gaming en colaboración co Concello de Marín, transformarase no núcleo do entretemento dixital o venres 6 e o sábado 7 de decembro na carpa do Parque Eguren.
O evento comeza o venres 6 ás 12.00 horas coa apertura da carpa, onde estarán dispoñibles xogos de mesa e Arcade durante toda a xornada.
Pola tarde, ás 16:00 horas, iniciaranse os wargames e un obradoiro de pintura, seguido ás 17.00 horas dos esperados torneos de EA Sports FC25 e Mario Kart, dous clásicos que prometen facer vibrar aos asistentes.
A xornada rematará ás 20:00 horas coa entrega de premios.
Xa o sábado 7, a diversión continúa. Os xogos de mesa e Arcade estarán dispoñibles durante todo o día, pero ás 13.00 horas chega unha novidade: un escape room que porá a proba o enxeño dos participantes.
Pola tarde, a partir das 16.00 horas, súmanse novos obradoiros, incluíndo un de iniciación ao rol, ademais dos wargames e pintura.
Ás 17.00 horas, os torneos de Brawl Stars e Mario Kart volverán facer as delicias dos gamers. O escape room finalizará ás 19.00 horas, cando se entregarán os últimos premios do evento.
CHARLAS CONTRA O CÍBERACOSO
O Marín Gaming non é só un evento para xogar, senón tamén para aprender. Como parte das actividades paralelas, Lua Gaming levará a cabo unha serie de charlas nos institutos de Marín para abordar a prevención e actuación contra o cyberbullying.
Estas sesións buscan concienciar á mocidade sobre os riscos do acoso nas redes sociais e nos videoxogos, ofrecéndolles ferramentas para identificar e combater estas situacións.
As charlas celebraranse o 29 de novembro no colexio SEI San Narciso, o 2 de decembro no IES Mestre Landín e no IES Illa de Tambo, e o 4 de decembro no IES Chan do Monte.
O evento está organizado por Lua Gaming, un club de deportes electrónicos 100% galego con proxección internacional.
Este club conta con embaixadores tan recoñecidos como os deportistas Iago Aspas, Ana Peleteiro e o influencer Xurxo Carreño.
