O centro urbano de Marín está estes días sendo obxecto de varias obras no trazado da Avenida de Ourense, correspondentes a diferentes actuacións.
Tal e como detallan desde o Concello, "sabemos o molestas que poden resultar as obras, pero estanse tratando de coordinar todas as actuacións, que son relevantes e necesarias de levar a cabo".
Reparación do bache na Avenida de Ourense, fronte á oficina de Abanca: A empresa Fechi, que forma parte da UTE encargada da parte da calzada da humanización da Avenida de Ourense procedeu esta luns a arranxar o socavón que se produciu neste punto da estrada, resolvéndoo definitivamente despois de que se pavimentase hai unhas semanas de xeito provisional.
Renovación dos servizos no entorno na Biblioteca e da futura rotonda: Aproveitando que se executará a nova rotonda no entorno da Biblioteca, o Concello de Marín, a través da Brigada Municipal de Augas, está a renovar os servizos neste punto, que xa estaban moi afectados polo paso do tempo e xeraban problemas con frecuencia, sendo algo que non se incluía na obra do Ministerio e que polo tanto está asumíndose con fondos propios.
Conexión da rede de saneamento co colector principal do Paseo da Avenida de Ourense: Ademais da propia humanización da beira dos edificios na Avenida de Ourense, estanse a realizar conexións entre a rede que vai por esa vía e o novo colector principal do Paseo. Estes traballos están realizándose por parte de Moncosa, a empresa da UTE encargada da humanización, e xa levan executados varios puntos de conexión.
Cambio da impulsión que une o colector do Río Lameira co da Avenida de Ourense: Dentro do gran proxecto de mellora do comportamento hidráulico do Río Lameira, co que se está actuando en todo o seu colector e conexións á rede, farase agora este traballo que reconecte o novo colector do río co da Avenida de Ourense.
Renovación da liña eléctrica de Fenosa na conexión entre Concepción Arenal e Jaime Janer Estase levando a cabo esta renovación, que xa se foi avanzando aproveitando as obras de humanización de Concepción Arenal. O obxectivo é renovar máis de 300 metros de liña e mellorar o subministro eléctrico, tratando de evitar os problemas que nos últimos tempos veñen sufrindo as persoas usuarias, especialmente na zona do cruce no que se verá afectado o tráfico estes días.