Ata o próximo 21 de abril está aberto o prazo para que todas as persoas interesadas en xestionar un dos quioscos das praias de Marín poidan presentar as súas ofertas.
Así o anunciou o goberno municipal de Marín, que indica que a concesión será ata 2028.
Son os quioscos de venda de xeados e refrescos e as súas terrazas, que ocupan un dominio público marítimo-terrestre con instalacións desmontables, que se habilitan entre o 1 de maio e o 31 de outubro de cada ano.
Os establecementos que se ofertan son un quiosco en Portocelo e outro en Mogor de 39 metros cadrados, outro en Aguete de 27 metros cadrados, outro en Loira de 62 metros cadrados e un no Santo de 16 metros cadrados.
Os canons anuais mínimos a abonar ao Concello para cada un dos lotes por anualidades e que poden ser mellorados polos licitadores son Portocelo (1.560 euros), Mogor (1.560 euros), Aguete (1.080 euros), Loira (2.480 euros) e O Santo (640 euros),
O abono total polas catro anualidades efectuarase por metades, debendo pagar o 50% con carácter previo á adxudicación da autorización nos dez días hábiles seguintes á notificación do requerimiento da documentación necesaria, para despois proceder á adxudicación.
O BAR DE PORTOCELO, DE NOVO A LICITACIÓN
Por outro lado, a técnica municipal realizou esta semana a correspondente inspección do bar de Portocelo do que a persoa que resultara adxudicataria da concesión presentou a renuncia.
Unha vez comprobado que todo se atopaba en bo estado e cumprindo coa normativa, agora o Concello procederá a sacar de novo a licitación a explotación deste local para que así poida estar aberto de cara ao verán.