María Escario, en 'As mulleres que opinan': "Non hai deporte feminino. Chamalo así xa é unha forma de discriminar"

Tras 43 anos, como ela mesmo di, "ao pé do canón", a María Escario chegoulle o momento de xubilarse. "Estou divinamente. Vívese moi ben sen traballar", afirmou a veterana xornalista de RTVE, que clausurou este sábado a oitava edición de 'As mulleres que opinan son perigosas'.

"A vida perdooume un par de sustos e agora teño claro que chegou o meu momento, o das cousas cotiás, o de vivir amodo e o de valorar as pequenas cousas", explicou Escario, que foi entrevistada pola codirectora do foro, Susana Pedreira.

Durante a súa intervención, a xornalista madrileña fixo un repaso ás súas máis de catro décadas na televisión pública que, para ela, "sempre foi un pouco por diante" á hora de darlle ás mulleres o lugar que lles corresponde na profesión.

Aínda que, como recoñeceu, os inicios tampouco foron fáciles. Aínda que xa tiña como referente a mulleres como Olga Viza ou Mercedes Milá, no seu primeiro día de traballo, en 1985, o seu xefe díxolle "dedícate a deportes de mulleres". O fútbol, o tenis ou o baloncesto "eran cousas de homes".

Pero ela, a pesar da súa mocidade, non quedou calada. "Díxenlle que me estaba discriminando. Boteille ovarios porque tiña 25 anos e podíame pór de patitas na rúa", lembrou unha muller que foi decisiva para o deporte feminino deixase de estar "tan desatendido".

O que moitos non saben é que, en 1990, estivo a piques de presentar o Telexornal 2, o informativo máis importante de TVE, pero dous anos despois ían ser os Xogos Olímpicos de Barcelona "e eu quería vivilo e contalo porque non se me ocorre algo máis bonito para un xornalista deportivo que contar uns xogos no teu país", así que rexeitou a oferta.

Fíxoo ademais porque, xa naquel entón, "tomei a decisión de envellecer contando o deporte diante dunha cámara porque non vía a mulleres maduras facéndoo".

Esa determinación e esa profesionalidade convertérona en todo un referente, especialmente entre moitas mulleres que quixeron seguir os seus pasos, algo que do que non foi consciente ata que "te fas maior e te cruzas con alguén que che di que estudou xornalismo por ti".

"Si o cres demasiado igual non levantas os pés do chan e iso non é bo, pero si che dá un sentido de responsabilidade", reflexionou María Escario, que recoñeceu que aínda que lle chamaron a atención por ser demasiado combativa "iso non me penalizou, ao contrario".

Ademais, Escario destacou a figura de mulleres que tiveron "moito poder" nos informativos de TVE como Concha García Campoy, Ángeles Caso ou unha Pilar Miró que, para ela, asinou nos anos 80 "a televisión máis transgresora que eu coñecín".

Á directora "masacrárona vilmente por machismo e por catro vestidiños", lamentou a xornalista, engadindo que "foi tremendo como foron a por ela Alfonso Guerra e algún máis".

A nivel persoal, durante a súa charla en Pontevedra, recoñeceu que a manifestación feminista de 2018 "foi un punto de inflexión brutal". Ela, como miles de mulleres, saíu á rúa ese día.

"Chorei moitísimo de emoción ao ver a tres xeracións de mulleres saír á rúa todas co mesmo compromiso e sen bandeira máis que unha, a morada para defender á muller", lembrou María Escario, que cargou contra os que seguen falando de deporte feminino.

Insistiu en que "non hai deporte feminino" e defendeu que chamalo así "xa é unha forma de discriminar", polo que avogou porque o xornalismo deportivo "utilice a linguaxe axeitada" e fale de mulleres no deporte ou das deportistas.