Cunha executiva renovada en máis dun 60% Rafael Louzán Abal foi reelixido presidente provincial do PP en Pontevedra por quinta vez consecutiva co apoio do 97,1% dos compromisarios asistentes ao Congreso Provincial do partido celebrado este sábado en Silleda.
Logo de ser reelixido, Louzán centrou a súa intervención na unidade e a cohesión do Partido Popular e na súa clara vocación municipalista que, tal e como subliñou, cobra un especial significado en momentos coma o actual, cando os alcaldes e alcaldesas están vivindo un dos peores momentos, non só por ter que facer fronte cada día a máis demandas con menos recursos, senón porque son tamén "o branco fácil" para os axitadores e manipuladores.
Louzán sinalou que só o PP está centrado en resolver os problemas da xente, e faino desde a unidade e a cohesión, porque "para tirar cada un para un lado xa temos a outros partidos. Nós temos que ser o que somos: un partido unido e cohesionado, porque cando hai unidade hai tempo para resolver os problemas da xente".
No polo oposto situou aos socialistas e nacionalistas, dos que indicou que están perdidos uns en loitas internas e en tratar de ⿿botar a Pachi Vázquez, que non se vai nin con auga quente"; e outros en "soberanismos e independentismos" que os galegos non reclaman.
Despois de agradecer a toda a militancia, ⿿aos máis" e 34.000 afiliados que conforman esta gran familia", a confianza no partido, Louzán comprometeu o seu traballo e o de toda a nova cúpula directiva para "non defraudarvos nunca".
A nova executiva inclúe 50 caras novas e unha profunda remodelación do comité, que incluirá postos de nova creación e unha estrutura máis adaptada ao que se pretende para esta nova etapa do partido, cunha especialización por áreas orientada a dar unha mellor resposta aos problemas sociais, segundo indicou o PP nun comunicado.
Neste sentido, á nova incorporación de Rocío de Sinde Penas, que substitúe a Begoña Estévez como secretaria xeral do partido, únese a creación do posto de voceiro, que desempeñará José Alberto Pazos Couñago. Como secretario de Organización entra Luis Serantes Álvarez e Eloisa María Nogueira Garrido será a vicesecretaria de Organización.
Repiten Figueroa e Crespo
Na cúpula directiva repiten nos seus cargos José Manuel Figueroa como vicepresidente e José Crespo como vicesecretario xeral. A eles únense 32 coordinadores de área, ademais dos 22 vogais e 21 membros natos.
Na presentación da candidatura, Louzán destacou que se trata "dun equipo forte, dun equipo renovado" que "quero que sexa o voso equipo, que todos e cada un dos militantes do PP teña nesta executiva alguén en quen se sinta reflexado". Subliñou que se trata dun equipo preparado para facer fronte á nova etapa que se abre e na que "o maior reto será estar ao lado da xente, pegados aos seus problemas, solidarizándose con eles".
Begoña Estévez realizou o seu derradeiro discurso antes de ser relevada como secretario provincial do PP facendo balance dos case tres anos e medio de mandato da executiva saínte. Un tempo que resumiu como "tres anos, tres citas electorais e tres resultados históricos".
Situou os éxitos electorais como unha mostra de que o PP "é un partido que convence", e iso é o que fixo posible acadar o récord histórico de alcaldías nas municipais de 2011, onde o partido tivo maioría absoluta en 36 concellos e conseguiu formar goberno en 47. Tamén foi esa capacidade de conectar coa sociedade a que permitiu que nas nacionais de novembro se conseguise ser a forza máis votada nos 62 concellos da provincia, un pleno nunca antes rexistrado e que marcou a chegada de Mariano Rajoy, "o máis destacado militante" do PP provincial, á Moncloa.
O presidente provincial de Novas Xeracións, Diego Gago, sinalou que a sanidade, a educación, a corrupción e o fraude, preocupan aos cidadáns "pero, sen dúbida, o noso principal problema é o paro, un auténtico drama social", que require medidas contundentes. Apostou por "poñer en marcha medidas que xeren a reactivación da demanda interna, como a mellor fórmula de preservar o emprego, o benestar e o progreso económico e social".
O vicesecretario xeral dos 'populares galegos', Agustín Hernández, incidiu en que "é preciso chegar a acordos concretos para a prestación dun servizo, ceder competencias ou, mesmo, se así se acorda, fusionar municipios", porque a escaseza de recursos fai imprescindible unha racionalización na prestación de servizos que nunca se debeu esquecer. Neste sentido, a proposta do PP establece como "ineludible" que as administracións "reformulemos as nosas pautas de actuación, tendendo cara a figuras máis compactas, que propicien unha maior eficiencia con menores custos e que evite o solapamento de servizos e funcións".