Que Bruxelas "chame a atención" a España ao entender que as concesións de até 75 anos na costa, como a de Ence en Lourizán, infrinxen as directivas europeas, segundo o alcalde de Pontevedra, Miguel Anxo Fernández Lores, demostra que "estamos na liña correcta".
Tras coñecerse o ditame da Comisión Europea, Fernández Lores sinalou que este é un paso máis no obxectivo de que "a verdade aflore nalgún momento" e quede demostrado que a prórroga concedida á pasteira até 2073 foi "fraudulenta" e unha "falcatruada".
"Nós sempre sostivemos que a prórroga de Ence foi un trato de favor a unha empresa determinada e desde logo un agravio comparativo para outras empresas", sostivo o alcalde de Pontevedra, que valora positivamente a "advertencia" dada a España.
Este procedemento abre ademais a porta a que este asunto chegue aos tribunais europeos, o que segundo o rexedor pontevedrés sería "axilizar o proceso", avanzando que cando poidan recorrer ás instancias xudiciais comunitarias "farémolo" para defender o seu posicionamento.
Lores reiterou que "sempre dixemos e así o repetimos hoxe" que o Concello utilizará "todos os mecanismos ao noso alcance" para recuperar a ría de Pontevedra, cuxo futuro "non pasa" por unha industria nun enclave natural e produtivo "de altísima calidade".
O alcalde subliñou que "estamos nese camiño" e defendeu que o equipo xurídico contratado polo goberno municipal "segue traballando no tema", polo que se esgotarán "todas as vías que poidamos esgotar" para oporse á permanencia de Ence.
"Namentres sexa alcalde de Pontevedra procurarei e usarei todas as vías para recuperar a ría para todos os pontevedreses e pontevedresas", sentenciou Fernández Lores, que lembrou que, por agora, o recurso do Concello atópase no Tribunal Constitucional.
Ademais, o rexedor da Boa Vila quixo comparar a prórroga de Ence cunha hipotética contratación a dedo e sen expediente que outorgase o Concello, algo polo que "probablemente estariamos inhabilitados neste momento".
Pero considera, con respecto a Ence, que "hai xente que ten dereito de pernada" e que existe un "trato de favor" cara a unha compañía que ten "moitos enlaces" en sectores económicos, políticos e xudiciais "que adaptan a lexislación aos seus intereses".