O alcalde de Pontevedra, Miguel Anxo Fernández Lores, respondeu ás críticas do vicepresidente da Deputación, Rafa Domínguez, respecto á situación das licenzas para as obras do convento de Santa Clara.
Lores destacou a seriedade do proceso que se está a acometer, tras coñecer as críticas do representante do PP, e sinalou a importancia das catas solicitadas por Patrimonio da Xunta de Galicia para poder emitir os informes.
Afirmou que "a min non me parece seria" a postura adoptada por Domínguez, que, segundo el, está a atrasar importantes proxectos na cidade.
"O xoves pasado deuse a licenza das catas", indicou, subliñando que "mentres non se fagan as catas non se pode dar licenza de nada".
O alcalde explicou que Patrimonio pediu a realización de once catas antes de poder avanzar na concesión das licenzas para acometer o proxecto arquitectónico.
Ademais, Lores destacou que "as administracións públicas teñen preferencia absoluta" na tramitación municipal.
O alcalde non dubidou en criticar a fórmula de Domínguez para "liar" os proxectos, afirmando que "cuestións que estaban moi ben enfocadas... el liouna e atrasou proxectos que estaban moi avanzados no anterior mandato na Deputación".
Lores explicou que "este señor (Domínguez) ten unha capacidade demostrada de liala importante" e que, se se adxudicara o proxecto previsto inicialmente, "xa levaría un ano de obras" a rehabilitación dos edificios históricos do Museo de Pontevedra e xa estarían iniciadas as da reforma de Santa Clara.
O alcalde insistiu na necesidade de seguir os protocolos establecidos, indicando que "non é verdade que se atrasen as licenzas doutras administracións" e que "hai informes sectoriais que teñen que ter para dar a licenza" municipal para autorizar o proxecto.