A Consellería de Educación, Ciencia, Universidades e Formación Profesional licitou por máis de 240.000 euros as obras de substitución das cubertas do Centro Público Integrado (CPI) Julia Becerra Malvar de Ribadumia.
Esta intervención, enmarcada no Plan de nova arquitectura pedagóxica da Xunta, ten como obxectivo mellorar a eficiencia enerxética e o benestar da comunidade educativa.
A actuación consistirá na substitución das tellas cerámicas existentes en tres bloques do centro por paneles sándwich de cor vermella, material xa empregado na anterior reforma do edificio.
Ademais, para facilitar o mantemento futuro, está previsto que se instalen tres claraboias, unha por bloque, e un canlón de aceiro inoxidable entre dous dos edificios.
Tamén se habilitará un novo acceso ao forxado baixo cuberta nunha zona que actualmente carece del. O prazo de execución será de tres meses unha vez se formalice o contrato.
Esta actuación forma parte da estratexia do Goberno galego para actualizar as infraestruturas escolares, garantindo espazos máis seguros, eficientes e adaptados ás necesidades pedagóxicas actuais.
O Plan de nova arquitectura pedagóxica inclúe melloras en iluminación, climatización e accesibilidade, así como a incorporación de materiais sustentables.
O CPI Julia Becerra Malvar xa foi obxecto dunha ampla reforma hai uns anos, que contou cun investimento superior a 840.000 euros.