A borrasca Kirk, que azoutou este mércores gran parte da costa galega, provocou o varamento dunha balea de quince metros en proceso de descomposición na praia de Pampaído, en Sanxenxo.
Persoal da Consellería de Medio Ambiente e Cambio Climático están a coordinar o operativo para retirar o animal varado, pero antes está previsto que esta tarde se lle faga unha necrose para descubrir as causas da morte.
Esta necrose será realizada por expertos da Coordinadora para o Estudo dos Mamíferos Mariños (CEMMA), responsable da rede de varamientos de Galicia no marco do convenio de colaboración que mantén coa Xunta desde hai máis de vinte anos.
A Xunta alertou ademais á empresa Gesuga, unha compañía que ten capacidade para xestionar os restos da balea, que desprazará ata o areal un camión para poder transportar o cadáver do animal ata as súas instalacións.
O acceso á praia, segundo confirman desde a consellería, non é fácil e a situación agravouse aínda máis polo temporal e a coincidencia da pleamar.
"Nestes momentos resulta difícil estimar cando se poderán tomar as mostras e proceder á retirada dos restos", afirma a Xunta de Galicia, que engade que haberá que esperar "en todo caso" a que melloren as condicións meteorolóxicas.
Esta foi a incidencia máis rechamante do paso de Kirk por Sanxenxo, onde ademais se rexistraron árbores e postes caídos, danos en colectores e a acumulación de balsas de auga, o que obrigou ao Concello a pechar os seus parques e diversas instalacións.
A balea será finalmente esnaquizada por unha empresa especializada que contratará o Concello e do seu tratamento como residuo encargarase a Xunta. Os traballos empezarán este xoves a partir das 11.00 horas.