A Garda Civil está a realizar investigacións para aclarar dous estraños sucesos sucedidos á primeira hora da mañá deste venres en Sanxenxo. Primeiro tiveron constancia dun accidente no que faltaba unha persoa dun vehículo e, poucos minutos despois, apareceu unha persoa falecida a varios metros do lugar.
O falecido é un coñecido empresario de Sanxenxo, I.C.G., de 62 anos, e o seu corpo apareceu, segundo informou o 112, nunha pista próxima a unha discoteca desa zona.
Segundo fontes consultadas por PontevedraViva, o falecido é pai do dono dun dos dous vehículos implicados no outro accidente, xusto do mesmo turismo no que se confirmou que faltaba unha persoa despois do sinistro.
Segundo informou Emerxencias de Sanxenxo, o accidente produciuse na estrada de circunvalación entre Portonovo e Sanxenxo. En concreto, segundo o 112 Galicia, foi ás 7.10 horas á altura do parque de Punta Vicaño, en Padriñán.
A partir de aí, toda a información é confusa. Segundo fontes do 112, tívose coñecemento do accidente por un sistema de avisos do propio vehículo, que daba alerta de que o vehículo tivera unha saída da vía. Urxencias Médicas, Emerxencias de Sanxenxo e a Policía Local desprazáronse ao lugar e atoparon co accidente, que consistía nunha colisión entre dous turismos. Ademais, había varias persoas feridas e constataron que faltaba unha persoa dun vehículo.
Poucos minutos despois, a Policía Local localizou nunha pista próxima, a varios metros, o cadáver dunha persoa falecida, que resultou ser o coñecido empresario, de modo que se alertou á Garda Civil.
A detención do fillo do falecido transcendeu á primeira hora desta tarde, aínda que as autoridades non confirmaron a súa relación concreta cos feitos.
Seu era un dos coches implicados no accidente, pero as primeiras investigacións descartan que estea relacionado de maneira directa coa morte do seu pai. O mozo entregouse voluntariamente ás autoridades.