A central sindical CIG convoca para este mércores 1 de febreiro asembleas de delegados e actos de protesta con motivo da reforma das pensións na que traballa o Goberno central.
Estas protestas forman parte da campaña iniciada en decembro baixo o lema 'Dez mentiras sobre as pensións'. O sindicato anuncia que estuda intensificar as mobilizacións para facer fronte ao que consideran unha ameaza.
Por este motivo ás 11.45 horas anúncianse concentracións diante do edificio sindical da Rúa Pasantería en Pontevedra e na Praza da II República, nas proximidades ao Auditorio, en Vilagarcía de Arousa.
Ademais, iniciouse tamén a recollida de manifestos, nas empresas, contra calquera reforma no sistema público de pensións que impoña aumentar os anos para o cálculo da pensión. Desde a CIG consideran que as pensións públicas levan anos sendo obxecto de duros ataques e afirman que o actual proxecto pretende ampliar a 30 anos o período de cálculo supoñendo un novo recorte das pensións de entre un 6 e un 8%.
A central nacionalista considera que esta reforma supoñería unha caída progresiva das pensións, que xa suma un 25% desde a última que se impuxo en 2011 ao ampliar a idade da xubilación de 65 a 67 anos e o aumento do período de cálculo das pensións dos 15 aos 25 anos.