Este luns instalan as estadas arredor das Ruínas de San Domingos para levar a cabo a retirada de vexetación das ábsidas deste monumento histórico pertencente ao Museo de Pontevedra.
Desde a Deputación indican que a intención é que os traballos finalicen esta mesma semana. Durante este período non se poderán realizar visitas aos restos do convento gótico do século XIV.
Segundo indican desde a institución provincial, estas herbas atópanse nas zonas superiores e supoñen un risco para a conservación das instalacións.
Os operarios utilizarán tesoiras de poda, escalpelos, bisturís e paus de hisopo de diferente grosor para coidar as zonas máis sensibles.
Ademais, está previsto eliminar tamén a sucidade superficial con limpeza en seco.
Instalarase morteiro das zonas nas que se retire a vexetación coa intención de que este conglomerado de cal hidráulico evite unha nova proliferación de herbas. Durante os traballos taparán os ocos e vanse a selar as xuntas.