Xeral

Homenaxe en Cambados aos mariñeiros falecidos con especial referencia ás vítimas do Villa de Pitanxo

O Salnés
25 de febreiro 2023
Actualizado: 27 de febreiro
PontevedraViva

Miguel Lumbres, vítima do naufraxio do Villa de Pitanxo, era de orixe peruana pero levaba máis de dez anos residindo no concello cambadés. O acto desenvolveuse nos xardíns da Casa do Mar co descubrimento dunha placa conmemorativa e unha escultura en granito, donada pola Escola de Canteiría da Deputación, en memoria dos mariñeiros tamén falecidos nos sinistros do Sin Querer Dos e do Bahía

Estatua en lembranza das vítimas de naufraxios e placa de recordo ás vítimas do Villa de Pitanxo, en Cambados
Estatua en lembranza das vítimas de naufraxios e placa de recordo ás vítimas do Villa de Pitanxo, en Cambados / Concello de Cambados

Miguel Lumbres, de 52 anos, era un dos mariñeiros que perdía a vida no Villa de Pitanxo, cuxo naufraxio se producía hai un ano en augas de Terranova, co falecemento de 21 mariñeiros. De orixe peruana, residía desde fai máis de dez anos en Cambados. No seu recordo rendíase este sábado unha homenaxe co descubrimento dunha placa en memoria de todas as vítimas daquel falta accidente marítimo, tal e como se está facendo en todos os municipios nos que residían os mariñeiros falecidos.

A subdelegada do Goberno en Pontevedra, Maica Larriba, asistía a este acto acompañando ás familias.

O acto realizado nos xardíns da Casa do Mar tamén contou cunha sentida homenaxe a todos aqueles mariñeiros, residentes en Cambados, que faleceron como consecuencia dos naufraxios do Sin Querer Dos, afundido na costa de Fisterra no ano 2018, coa morte de Manuel Serén, Teófilo Rodríguez, Guillermo Casais e Bernardino Padín; e do Bahía, protagonista doutra catástrofe marítima nas Illas Sisargas en 2004 coa morte de dez tripulantes, entre os que se atopaba Antonio Domínguez Baulo, residente na vila cambadesa.

Como homenaxe, a Escola de Canteiría de Poio, dependente da Deputación de Pontevedra, doou unha escultura denominada 'Despedida' na que se mostra a un mariñeiro co seu fillo. 

Este domingo continuarán os actos de recordo aos tripulantes do Villa de Pitanxo cun acto en Moaña, mentres que en Cangas está previsto que se celebre o sábado 4 de marzo.

O Concello de Cambados, despois de rexistrarse unha polémica sobre a falta de nomes na placa da escultura 'Despedida', indica que a homenaxe aos náufragos ubicada nos Xardíns da Casa do Mar componse de dúas partes.
 
Por unha banda, a placa en lembranza do Villa de Pitanxo, deseñada pola asociación de familias dos mariñeiros falecidos e desaparecidos no naufraxio en augas de Terranova e que é a mesma para todos os municipios onde residian as víctimas.
 
A outra parte, a propia homenaxe do Concello de Cambados a todos os náufragos do municipio é a escultura 'Despedida', onde nos vindeiros días se colocará unha placa co nome dos mariñeirosfalecidos no mar nos últimos anos, previo consenso coa Confraría de Pescadores.

 

Arquivado en
Máis novidades