O 11 de decembro, Elnosa deixará de producir cloro na súa fábrica de Lourizán por imperativo da Unión Europea, que prohibe a utilización de mercurio. Un mes antes, o venres 10 de novembro ás 20.00 horas, celebrarase unha manifestación convocada polo comité de empresa de Elnosa en defensa dos postos de traballo dignos na comarca de Pontevedra. A marcha sairá da praza da Ferrería e finalizará na praza de España.
Este martes, os integrantes do comité mantiveron un encontro en Pontevedra co secretario xeral de Comisións Obreiras en Galicia, Ramón Sarmiento, que indicou que reclamarán á CUF, a empresa portuguesa propietaria de Elnosa, que garanta por escrito a continuidade dos postos de traballo na factoría cando se deixe de producir cloro e comece a elaboración de hipoclorito sódico.
Segundo apuntaba Avelino García, presidente do comité de empresa, está previsto que unha gran parte dos 65 traballadores da fábrica manteñan a actividade a partir do 11 de decembro tanto na elaboración de hipoclorito como no desmantelamento do sistema actual de produción de cloro.
García indicou que, a finais deste ano, se vai a producir un desabastecemento de cloro no mercado. "Non hai sosa en Europa", indicou o máximo representante dos traballadores da cloreira, pero sinalou que o grupo CUF mantén o seu compromiso cos clientes. Admitiu que, por exemplo, Ence ten un contrato coa empresa portuguesa para a subministración de cloro durante dous anos máis. Avelino García entende que a empresa lusa nutrirase doutras electroquímicas ou de factorías de Portugal.
Ante esta situación, Sarmiento alertou sobre o tecido produtivo que está a quedar no sur de Galicia ao que considera de baixa calidade e estacional. Por iso lembrou a necesidade de demandar a través da manifestación actividade industrial con empregos en boas condicións e, neste sentido, reclama unha planta de cloro de última tecnoloxía.
O comité de empresa anunciaba tamén unha exposición que desenvolverán na praza da Peregrina con recortes de prensa durante o sábado 4 de novembro coa intención de que se visualice o trato ofrecido polas distintas agrupacións políticas á cloreira.
Namentres, os traballadores seguen á espera do que suceda coa autorización ambiental integrada pendente da Xunta e da decisión que se adopte por parte do Ministerio de Medio Ambiente para conceder a prórroga que lles permita manterse en Lourizán.