Un grupo de cidadáns reitera a súa solicitude ao Concello de Pontevedra para que se preserve a zona do humidal da Parda.
Foi o 2 de xuño de 2010 cando presentaron no Rexistro municipal un escrito do que ata hoxe non tiveron resposta.
Coñecida como "Xunqueira da Parda", ten unha superficie duns 8.000 metros cadrados e está situada detrás da estación do tren, xunto ao proxectado parque con pavillóns deportivos e o edificio dos xulgados.
Nun escrito dirixido ao alcalde, Miguel Anxo Fernández Lores, estes biólogos, conservacionistas, naturalistas e micólogos destacan que esta zona debe preservarse "dado o seu interese biolóxico, onde se poden observar diferentes especies tanto de flora como de fauna, que utilizan ese espazo para refuxio, alimento e cría".
Recalcan a "riqueza medioambiental" destes espazos "tanto para aves como para os invertebrados, e a flora específica destes hábitats, sobre todo cando se atopan inmersos nun espazo urbano".
Estes cidadáns recoñecer ser "conscientes do crecemento urbanístico que se dá nesta zona", pero apuntan que "se presenta unha gran oportunidade de englobar este ecosistema neste espazo urbano" sempre "respectando as políticas de sustentabilidade que a sociedade demanda".
Ademais reclaman un estudo en profundidade do humidal, coa catalogación das especies, así como da xeoloxía do lugar para a súa posterior protección.
Nesta contorna está previsto que, ao longo da primeira quincena de marzo, as empresas COVSA e Construcións Ramírez comiencen as obras para a creación do novo parque da Parda, unha gran zona verde duns 33.000 metros cadrados que terá á auga con fío condutor de todo o seu espazo.
A execución do parque está prevista en 28 meses. Esta actuación conta cun orzamento de 5,3 millóns de euros.
Dos 33.000 metros cadrados, uns 10.000 reservaranse para o futuro pavillón da Parda, un proxecto que se vai a acometer por separado e para o que aínda se están definindo todos os detalles. Mentres non se defina, todo este espazo será unha pradaría.
No resto deste futuro parque plantaranse 1.800 árbores e especies arbustivas, repartidas especialmente entre as súas múltiples zonas axardinadas. Haberá ademais dúas zonas de aparcadoiro, unha próxima aos xulgados e a outra cara á Rúa Entrevías.
Ao longo de todo este ámbito, aproveitando as diferentes alturas do terreo, habilitaranse varios miradoiros sobre a estación do tren e a cidade. O proxecto incluirá ademais un parque infantil e paseos habilitados ao longo de toda a canle de auga.
A este futuro parque poderase acceder por dous lugares, a través desde a zona dos xulgados da Parda e tamén polas rúas Entrevías e Ramón Otero Pedrayo.
Desde esta segunda zona, vaise a poder conectar ademais co parque do Gafos, de maneira que quede unha gran área natural e de esparexemento que comunique tamén con Tomeza, segundo o goberno local.