"Seguiremos avanzando ao noso estilo". É o propósito do novo ano de Alfonso Rueda, que este 2024 fixo balance moi centrado na educación e co recordatorio de que Galicia é "unha terra que non ten máis límites que os que consintamos en pornos".
Rueda trasladouse até o Pazo de Fonseca e a súa Biblioteca América, en Santiago de Compostela, para a súa tradicional mensaxe institucional de fin de ano como presidente da Xunta de Galicia.
Desde este Pazo, no que "reina o silencio" en pleno Nadal, acordouse deses estudantes que están a aproveitar as últimas horas antes das uvas para repasar os apuntamentos dos exames de xaneiro e mostrou o seu desexo de que as novas xeracións en Galicia "atopen cada vez menos obstáculos no camiño para converterse naquilo que queren ser".
Para logralo, lembrou que desde este 2024 todos os estudantes que aproben poden matricularse gratis nunha universidade galega. "Se hai vocación, se hai talento e se hai esforzo, a capacidade económica da familia non debe ser xamais un obstáculo para facer unha carreira", destacou o presidente galego.
Tamén prestou atención á Formación Profesional, sinalando que os datos marca evidencian que cada vez son máis as galegas e galegos de todas as idades que "optan con orgullo por facer un ciclo".
A educación, lembra Rueda, é clave para o progreso dun país: "abre portas, reduce diferenzas sociais e multiplica oportunidades para crecer". E en Galicia é agora gratuíta en todas as etapas, desde infantil até a universidade.
Non se esquece o presidente da "Galicia universal" e emigrante. Desde a Biblioteca América, que foi "o soño dun emigrante que se propuxo reunir aquí en Galicia unha mostra da cultura do novo continente", lembra que "hai un pouco de Galicia en todas partes, e tamén hai moito de todas partes aquí en Galicia".
Mira ás migracións en ambas as direccións, desde os emigrantes que "sempre estivemos dispostos a integrarnos en sociedades que nun principio nos eran alleas" aos inmigrantes que recibe a comunidade, sempre aberta a "permitir que persoas chegadas de moi lonxe contribuísen ao noso progreso".
Pensando en quen emigraron, lembra a Estratexia Retorna que ofrece facilidades aos galegos do exterior que desexan volver a casa e tamén insiste en que non sexas preciso que ninguén máis se vexa obrigado a deixar a súa terra. "Para iso é necesario que en Galicia haxa postos de traballo de calidade e ben remunerados, e en todos os sectores", sinala.
E considera Rueda que tamén deben atopar aquí un fogar en condicións e que "ofrecer solucións debe estar entre os propósitos de Ano Novo de calquera Administración". Por iso, entre os seus propósitos inclúe seguir traballando "para que no Nadal de 2028, dentro de apenas catro anos, haxa o dobre de vivendas públicas das que existen actualmente".
Ao facer balance do ano, ve obrigado lembrar ás persoas que sufriron a catástrofe de Valencia, especialmente ás que perderon un ser querido, pero tamén ás que perderon a súa casa ou o seu negocio. "Galicia vai seguir estando cos valencianos agora tamén, na recuperación", avanzou.
Este 2024 foi o da reelección de Rueda como presidente e no seu discurso lémbrao: "A nosa comunidade escolleu o camiño polo que quería seguir avanzando". Recolle a luva que lle deron os electores e promete: "Tócanos agora aos representantes públicos que fomos elixidos cumprir coa vontade da xente, e seguir facendo de Galicia unha excepción de serenidade, unha excepción de responsabilidade e unha excepción de altura de miras".
