A Xunta de Galicia estudará como adaptar os portos de titularidade autonómica para adaptalos ao cambio climático e contrarrestar os efectos que este poida producir nas súas instalacións ou sobre as actividades que se desenvolven neles.
Para este obxectivo traballarán conxuntamente os departamentos de Mar e de Medio Ambiente, Territorio e Vivenda do goberno galego, como recolle o convenio que as súas dúas titulares, Rosa Quintana e Ángeles Vázquez, asinaron en Sanxenxo.
A través do organismo Portos de Galicia, o executivo de Alberto Núñez Feijóo destinará 132.000 euros a elaborar diversos estudos que analicen a vulnerabilidade de cada tramo de costa fronte aos efectos do quecemento global.
Vázquez explicou que, realizando un seguimento do aumento do nivel medio do mar, da súa temperatura superficial ou da súa acidificación, poderanse deseñar plans de acción con medidas destinadas a "aumentar a resiliencia da costa galega".
Unha destas medidas, adiantou a titular de Medio Ambiente, será a implantación dun sistema de alerta temperá, que integre a previsión meteorolóxica con información específica sobre as condicións de navegabilidade nas canles de navegación, a axitación interior no porto ou as condicións de pase e inundación.
Esta iniciativa enmárcase no esforzo de facer de Galicia "parte da solución dun fenómeno global como é o cambio climático", segundo a dirixente autonómica, e protexer a costa galega como espazo que acolle unha "gran actividade" socioeconómica.
A conselleira de Mar, pola súa banda, engadiu que este convenio permitirá profundar no estudo sobre o cambio climático e preparar os 122 portos de titularidade autonómica para afrontar os seus efectos, ao entender que son "fundamentais" para crear emprego e riqueza.
A este respecto, Rosa Quintana reiterou a "importancia" que a Xunta outorga aos plans para "mitigar" o impacto do cambio climático, garantindo o desenvolvemento futuro das actividades costeiras e especialmente as relacionadas coas zonas portuarias.