Furor en Pontevedra pola tenda de "paquetes sorpresa" con devolucións de Amazon, AliExpress e Shein

Desde finais de marzo, a rúa Cruz Gallástegui ten un novo inquilino que está a revolucionar os pontevedreses.

Cada día, excepto os mércores e domingo por peche, a clientela enche o local en busca de choios, nun modelo de negocio que está a triunfar en cidades de toda España, pero que aínda non se estreara en Pontevedra.

Trátase da tenda Crazy Day Factory, unha cadea que vende "paquetes sorpresa" nos que o comprador non sabe que se vai a atopar. A singularidade principal é a orixe desas caixas. Son devolucións de produtos de Amazon, Aliexpress e Shein.

A propietaria do negocio vive en Bilbao, onde xa ten outra tenda destas mesmas características, e en Pontevedra confiou nun equipo de dous traballadores e nunha amiga para levar esta tenda que está a causar auténtico furor.

O encargado, Juan, explica que venden a 10 euros paquetes devoltos nas citadas plataformas de venda online en paquetes pechados de tal forma que o comprador non sabe que hai dentro. Segundo indica, hai clientes que xa os abren nada máis saír da tenda, na rúa, e aí poden ver as súas caras de sorpresa.

"É como botar unha lotería", din algúns clientes que percorren o local en busca da caixa na que confían que atoparán o mellor botín. Hai momentos do día nos que hai tantas persoas que resulta ata complicado circular polo corredor, a ambos os dous lados dos caixóns centrais onde están depositados os paquetes sen orde. 

Sen saír da propia tenda, apoiado no mostrador, abre o seu paquete Biram. É a súa primeira vez e comprou sen expectativas. Nada máis abrilo, quedou satisfeito. Dentro había un reprodutor multimedia para o coche, con todo o cableado e todo o material necesario para instalación. "Vén completo, polo prezo está ben", conclúe.

Tamén Luís se anima a abrilo alí mesmo. É a súa primeira vez tamén para el e asegura que "veño con poucas expectativas, polo xogo da sorpresa". Non lle custou moito escoller un paquete porque se deixou levar "polas sensacións, porque me gusta o son".

"Dei unha volta e probei", relata, sobre o proceso de selección. Finalmente, detrás dese son había dous obxectos, un vaso termo xigante e unha batería externa para o móbil e outros dispositivos electrónicos. Tamén marcha a casa satisfeito.

Nos primeiros días de actividade, segundo contan os responsables do local, houbo paquetes para todos os gustos. Unha clienta atopou un vaso termo da marca Balenciaga valorado en 250 euros e outro un equipamento completo da saga de Harry Potter valorado en máis de 100.

Houbo bolsos, vestidos, xoias, material para coches ou motos, equipamento informático ou xogos de distinta natureza. Dentro dos paquetes a oferta é tan variada como nas plataformas Amazon, Shein ou Aliexpress.

Ademais dos paquetes sorpresas de todos os tamaños e pesos, a oferta da tenda complétase con outros produtos que si están á vista.

Son tamén obxectos devoltos desas mesmas plataformas de venda online, pero destes coñécese o contido porque o paquete chegou á tenda xa roto ou aberto ou porque, nada máis tocalo, xa era fácil adiviñar que había dentro. Ábrense e ponse á venda a prezos reducidos.