A frota cefalopodeira de Marín volveu sufrir un duro revés na Comisión Mixta UE -Mauritania, reunida esta semana na localidade mauritana de Nuakchot, e que culminou as negociacións sobre o acordo de pesca en contra dos intereses dos barcos galegos.
O obxectivo destas negociacións, ás que asistiu o Secretario Xeral de Pesca do Ministerio, Carlos Domínguez, era persuadir a Mauritania para que permitise a participación de barcos da Unión Europea nunha campaña científica que servise para desenvolver un novo modelo de xestión do polbo.
Non obstante, segundo informa dende o Goberno de España, as autoridades mauritanas reiteraron ás autoridades comunitarias e españolas a súa firme decisión de reservar para a súa frota os recursos de polbo dispoñibles, en tanto non se xeren novos excedentes. Non obstante, acordáronse os termos de referencia para a elaboración dun protocolo científico para deseñar un novo modelo de xestión do polbo.
O Ministerio de Agricultura, Alimentación e Medio lamenta que non fose posible incluír algúns barcos cefalopodeiros españois na campaña científica que se desenvolverá cando o Comité Científico finalice o seu traballo. Entrementres, e segundo o acordado coa Xunta e o sector pesqueiro afectado, o Ministerio seguirá traballando para asegurar que a frota cefalopodeira volva faenar no prazo máis breve posible.
Para el, e entre outras xestións, a Secretaría Xeral de Pesca pedirá a Comisión Europea que contemple a esta frota nun futuro acordo con Senegal, que procure a reactivación do Acordo con Guinea Bissau, suspendido por motivos políticos, e que fomente a cooperación pesqueira con Guinea Conakry.