15 estudantes de terceiro curso de Fisioterapia son os encargados de organizar a festa de Santo Aquiles, o patrón desta carreira universitaria, durante a xornada deste xoves 9 de abril cunha festa que se desenvolve neste centro do campus pontevedrés.
Os alumnos, segundo publica o Duvi, recadan fondos coas actividades que se organizan ao longo da xornada para a viaxe que planean realizar no mes de xuño á Riviera Maya en México. A xornada que se iniciaba ao mediodía conta con actividades relacionadas con música, xogos e diferentes competicións.
O principal atractivo centrouse na tarde cunha competición na que destacaban diferentes xogos coa participación de grupos de cinco persoas que teñen que enfrontarse a carreiras de relevos, busca de obxectos escondidos e outras probas na liña do concurso televisivo Grand Prix.
Catro djs tamén participan nesta xornada amenizando musicalmente as actividades dende a carpa que se encontra instalada nas portas do centro e tampouco falta un "pousadoiro" (photocall) para aqueles visitantes que queiran retratarse no evento. Nesta xornada búscase tamén que se relacionen os estudantes de diferentes cursos e, neste sentido, as clases da tarde foron desprazadas a outra xornada.