A Fiscalía pide unha condena de nove meses de prisión por un delito de lesións no ámbito da violencia doméstica e dous anos polo delito de atentado contra a autoridade, para unha muller acusada de agredir á súa parella e a un axente da Garda Civil que tentou mediar.
O xuízo foi sinalado pola sección segunda da Audiencia Provincial de Pontevedra para o vindeiro xoves día 3 de abril.
O escrito de acusación da Fiscalía explica que os feitos que se van a xulgar sucederon o 18 de agosto de 2022, sobre as 23.30 horas, cando a acusada se atopaba coa súa parella na hamburguesería A Meiga, de Cangas.
Segundo o relato do Ministerio Público, a acusada mostrábase agresiva e, "con ánimo de menoscabar a integridade" do seu noivo, "agrediuno reiteradamente con arañazos e patadas".
Nese momento, un axente da Garda Civil que se atopaba fóra de servizo decidiu intervir para mediar. Tras identificarse e mostrar a súa placa, a acusada díxolle "ni guardia civil ni mierda, hijo de la gran puta, déjame en paz, ojalá te mueras tú y toda tu familia, como te toque te juro que te mato".
E, ademais dos insultos, golpeou ao axente no corpo mentres este procedeu a suxeitar á acusada e reduciuna. Cando a muller xa parecía tranquila incorporouna e ela aproveitou para rabuñalo e golpealo de novo con patadas.
A consecuencia destes feitos, o axente sufriu diferentes lesións nas extremidades que mesmo precisaron de intervención cirúrxica e deixáronlle secuelas.
Ademais dos dous anos e nove meses de prisión, a Fiscalía tamén solicita ao tribunal que lle impoña á procesada a prohibición de aproximarse a unha distancia inferior a 150 metros da súa parella, así como de comunicarse con el por calquera medio durante dous anos.
En concepto de responsabilidade civil, o Ministerio Público demanda que a acusada indemnice ao axente con 12.000 euros polo tempo que tardaron en curar as súas lesións, 750 euros pola intervención cirúrxica e 3.400 polas secuelas psicofísicas e prexuízo estético, así como 4.500 euros por prexuízo moral. A súa parella renunciou a reclamar a indemnización que puidese corresponderlle por estes feitos.