Un traballador resultou ferido no Covelo (Poio) ao sufrir diversas queimaduras que lle provocou o estalido que se produciu nun cadro eléctrico.
O suceso rexistrouse sobre as tres da tarde, segundo informou o 112 Galicia.
Foi un particular o que alertou aos servizos de emerxencias tras escoitar a explosión.
Durante a súa chamada, esta persoa indicou que parecía tratarse dun transformador do que estaba a saír moito fume, nas escaleiras que baixaban ao peirao do Covelo.
Desde o 112 Galicia mobilizaron ao servizo de Urxencias Sanitarias de Galicia-061, aos Bombeiros de Ribadumia, ao GES de Sanxenxo, á Garda Civil e a Protección Civil de Poio.
Os medios que interviñeron no suceso indicaron que o lume se produciu nun cadro eléctrico, o cal ardeu por completo.
Ademais, a persoa que se atopaba traballando nel sufriu queimaduras nun brazo, o que provocou que tivese que ser trasladada a un hospital.