O condutor dun turismo que viaxaba na tarde deste venres pola N-554 ao seu paso pola parroquia de Santa Cristina de Cobres, en Vilaboa, levaba por diante a terraza do bar O Chancho de Vilaboa.
No impacto, o vehículo causaba feridas a catro persoas que se atopaban sentadas na terraza.
Segundo o 112, o accidente rexistrábase ás 16.58 horas e aínda se investigan as causas do suceso.
Segundo as primeiras fontes consultadas, o condutor do Mercedes se atopaba a poucos metros da cafetería e perdeu o control do vehículo ao manobrar cando tentaba aparcar impactando coa mesa onde catro veciños da parroquia se atopaban xogando ao dominó.
O 061 desprazou cinco ambulancias, dúas de soporte vital básico e outras dúas de soporte vital avanzado, ademais dunha última de soporte vital avanzado enfermeiro, para atender aos feridos no mesmo lugar en que se rexistraba o incidente.
Segundo informa o 061 foron trasladados dous homes, de 79 e de 67 anos de idade, ao Hospital Álvaro Cunqueiro de Vigo. Un terceiro veciño, tamén de 67 anos, que se atopaba na terraza foi conducido ao Hospital Montecelo da área sanitaria de Pontevedra. O cuarto ferido foi atendido no mesmo lugar do accidente.
Finalmente dúas das persoas, malia ser trasladadas ao centro hospitalario, falecían debido á gravidade das feridas provocadas polo turismo.
Desde o 112 alertouse á Garda Civil, a Protección Civil, a Bombeiros do Morrazo e a mantemento de estradas.