José María Domínguez Vidal, presidente nos últimos anos da Comunidade de Montes de Campañó e figura clave no asociacionismo da parroquia pontevedresa, faleceu este 10 de marzo aos 65 anos de idade, despois de enfrontarse a unha grave enfermidade durante os últimos meses.
Funcionario da Deputación de Pontevedra, Domínguez foi un dos responsables da creación da Asociación Cultural Deportiva (ACD) Campañó, entidade da que foi secretario durante décadas.
A súa traxectoria estivo marcada polo compromiso coa comunidade, destacando o impulso da proba deportiva Carreira Pedestre de Campañó, un evento que se consolidou como un referente en Pontevedra.
Nado en 1959, Domínguez foi testemuña e protagonista da creación da primixenia Sociedade Cultural Deportiva Campañó en decembro de 1984, entidade que en 2004 renovaría os seus estatutos para converterse na actual ACD Campañó.
Xunto a Ángel Ucha, actual presidente da asociación, formou parte da primeira directiva elixida.
Dende entón, a súa dedicación foi fundamental para consolidar un proxecto que chegou a superar as duascentas persoas asociadas e que promoveu diferentes iniciativas culturais e sociais.
O seu labor foi recoñecido en agosto de 2024 cando, xunto a Ucha, recibiu unha emotiva homenaxe da veciñanza polos seus esforzos a favor da parroquia durante as últimas décadas.
O velorio de José María Domínguez permanece na sala 1 de San Marcos de Poio, e o funeral terá lugar este martes 11 de marzo, arredor das 16.00 horas, na Igrexa de San Pedro de Campañó.