A oitava edición de Etiqueta Negra, o salón do gourmet galego, avanzaba con gran éxito na súa segunda xornada.
O evento, que se celebra no Recinto Feiral de Pontevedra, está a consolidar a cidade como un epicentro gastronómico, atraendo a un público diverso e apaixonado pola alta cociña.
Tras unha xornada inaugural marcada pola afluencia masiva de visitantes, este domingo, 10 de novembro, os asistentes volveron encher o recinto para participar no programa de actividades con experiencias únicas para os padais máis esixentes.
Entre as propostas destacadas do día, o Anfiteatro acolleu ás 13:00 horas a demostración 'Saboreando a Artesanía Alimentaria', liderada pola recoñecida chef Begoña Vázquez.
Este showcooking, patrocinado pola Axencia Galega de Calidade Alimentaria, puxo en valor a artesanía alimentaria galega ante un público entregado.
Xa pola tarde, Javier Olleros, chef de Culler de Pau e recente gañador de dous coitelos nos premios The Best Chef, protagonizou unha innovadora sesión que combinou ciencia e gastronomía.
Acompañado por expertos da Misión Biolóxica de Galicia, Olleros elaborou pratos que resaltaron o potencial dos cultivos autóctonos na alta cociña.
A xornada propón tamén unha exhibición de alta repostaría a cargo do chef pasteleiro Manuel Garea, quen traerá a súa experiencia internacional ao público galego.
Na Zona de Catas, os asistentes tiveron a oportunidade de gozar dunha ampla selección de produtos galegos de primeira calidade, mentres que no Espazo Etiqueta, Carlos Ávila de Hijos de Rivera presentou as últimas novidades cervexeiras, cunha gran acollida entre os presentes.
XORNADA DE CLAUSURA
Este luns, 11 de novembro, a feira conclúe e promete seguir sorprendendo cos seus encontros profesionais e actividades dirixidas a estudantes de formación profesional de toda Galicia.
Etiqueta Negra tamén exerce como plataforma de negocio e de encontro entre profesionais do sector gastronómico.
Durante este luns, celebraranse numerosos Encontros Profesionais que brindarán aos expositores a oportunidade de conectar con exportadores, distribuidores, retallistas, tendas especializadas, restauradores e outros profesionais do sector. Estes encontros teñen como obxectivo facilitar o acceso a novos mercados.
Máis de mil estudantes terán a oportunidade de coñecer de preto as últimas tendencias do sector gourmet galego, nunha xornada que pechará a edición deste ano con notable éxito.
