A Lama está na busca de financiamento para humanizar e facer un aproveitamento sostible do espazo público que rodea o centro de día que se acaba de construír na localidade.
Para iso, o alcalde, David Carrera, mantivo unha xuntanza de traballo co xerente do Consorcio de Servizos de Igualdade e Benestar, Perfecto Rodríguez.
Ambos coincidiron en que se debe elaborar un proxecto para mellorar o entorno do centro, que entrará en funcionamento nos vindeiros meses e que precisa dunha actuación neste sentido.
Tras unha visita ao centro de día, xa dotado de equipamento para poder abrir, Rodríguez coincidiu co alcalde na necesidade de darlle unha solución aos problemas de humanización e mellora dos baixos e do entorno deste edificio, que resulta moi luminoso e funcional.
Así, o alcalde e o xerente do consorcio comprometéronse a estudar varias posibilidades que permitan dar unha mellor imaxe do entorno, así como dotar á zona de elementos que contribúan a ofrecer maiores servizos para os usuarios e persoas maiores que se acheguen ata alí.
O centro de día da Lama ten a obra civil rematada e tamén está dotado de mobiliario e elementos de habitabilidade para entrar en servizo de inmediato.
Só queda pendente de rematar o proceso de adxudicación da súa xestión externa.
En principio, estas instalacións darán servizo a vinte usuarios diurnos e seis en atención residencial e foron construídas por iniciativa do Concello da Lama, grazas a un investimento da Xunta que ascendeu ata os 230.000 euros.