O BNG de Marín reclama medidas urxentes para garantir a seguridade nas escadas que conectan a rúa Ezequiel Massoni co cemiterio da Raña, tras rexistrarse varios incidentes por esvaróns.
A portavoz nacionalista, Lucía Santos, presentou esta demanda na última Comisión de Turismo e Comercio, celebrada o mércores.
Santos explicou que a infraestrutura, instalada en 2020 para facilitar o acceso ao camposanto, ofrece graves problemas de seguridade debido ao material de madeira empregado e á súa localización sombría, que favorece a acumulación de humidade.
Como exemplo da perigosidade destas escadas, a edil nacionalista citou un recente accidente no que unha persoa sufriu unha caída que lle provocou unha ferida na fronte que precisou catro puntos de sutura.
"Non podemos permitir que unha infraestrutura creada para facilitar o acceso ao cemiterio se converta nun foco de perigo constante para a veciñanza", declarou Santos.
Os nacionalistas propoñen solucións concretas como a aplicación de tratamentos antiesvaróns ou a substitución do material actual por outro máis axeitado.
Mentres non se adopten medidas definitivas, o BNG solicita o precintado temporal das escadas ou, cando menos, a instalación de sinais que advirtan do risco aos usuarios.
A formación nacionalista agarda unha resposta dilixente do goberno local para previr novos accidentes e garantir a seguridade das persoas que empregan esas escadas de maneira habitual.
