E se aquel complexo lúdico deportivo da Parda do que tanto se escribiu nos primeiros anos deste século se tivera feito en tempo e forma, o mesmo os veciños de Entrevías non estarían na situación actual.
Poñendo outro 'e se...' máis, se se materializa o actual proxecto municipal do gran parque da Parda, o mesmo estes veciños de Entrevías revertan a situación de abandono desta rúa e a súa contorna, tal e como denuncian en PontevedraViva e que tamén teñen exposto por escrito no Concello de Pontevedra.
Feito constatable achegándose a este vial, anexo ao Camiño de Santiago na súa entrada a Pontevedra e ao que se accede desde Ramón Otero Pedrayo, é o abandono no mantemento de varias parcelas.
Unha a correspondente a Adif, onde o noiro anexo á vía do tren acumula tal cantidade de maleza que hai algún tramo onde o valo está cedido. Outra, unha parcela de titularidade municipal onde se almacena material viario e "onde tiran e tíranse entullos, nalgúns casos aproveitando a nocturnidade", teñen detectado, ademais de acumular igualmente unha cantidade inxente de malezas.
"Saen ratas de aí", comenta unha das residentes, "a min chegáronme a subir á segunda planta da vivenda e entrado dentro de casa". Outra muller engade que non son os únicos animais que saen desta espesura: "de aí saíume unha serpe e quedou siseando en metade do camiño". Á fauna que teñen avistada engaden jabalíes e algún raposo. Ademais destas dúas parcelas, hai que engadir outra superficie titularidade de Fenosa en estado de abandono e anexa a outra propiedade privada en venda "desde hai tempo".
O suma e segue para desesperación destes interlocutores está nos ruídos que provoca o tráfico ferroviario; e tamén a falta dun servizo de limpeza adecuado. "Podes ver xunto a ese muro todo tipo de cousas que se acumulan", sinala outra veciña cara a envases, plásticos ou preservativos usados.
Coinciden noutra circunstancia: estes abandonos provocan que o lugar se utilice de forma reiterada para trapicheo de drogas. "Fai cousa dunha semana a Policía detivo aquí a varias persoas" e foi tras varios intentos, precisan, porque ademais este mercadeo ilícito lévano denunciando desde hai anos.
A única e recente satisfacción sobre o estado do seu lugar de vida é a sinalización horizontal para restrinxir o estacionamento. "Esta rúa úsase moito como estacionamento e como aparcaban a ambos os dous lados, ás veces non podiamos sacar os coches e mesmo o camión do lixo non podía pasar", apuntan.
Grazas, posiblemente a esta novidade o suceso ocorrido na mañá deste pasado venres non tivo consecuencias máis graves. Dous vehículos, estacionados no tramo de Otero Pedrayo que conflúe con Entrevías, ardían por causas que determinará a correspondente investigación.
"A actuación de Bombeiros foi moi rápida, hai que dicilo, se non, con tanta maleza, o perigo é enorme. E menos mal que xa non podían estar estacionados xunto ao muro, se chega a ser así, estabamos a falar dunha situación moitísimo máis grave", afirman.
"Nós pagamos os nosos impostos e taxas como o resto de cidadáns e de residentes da zona urbana, e como estamos?, abandonados", laméntase unha destas veciñas ao que replica seguidamente outra conveciña: "e estamos na entrada á cidade pola que chegan máis persoas a pé, que imaxe estamos a dar?".