Nesta nova entrega de "A cociña gourmet en conserva" imos elaborar unha ensalada que leva como principal ingrediente a exquisita ventrecha de bonito do norte da gama gourmet de Conservas Pescamar.
A parte do bonito do norte máis valorada pola alta cociña é a ventrecha. Recibe o seu nome por atoparse na zona do ventre do bonito, onde se concentran proteínas de alto valor biolóxico e ácidos graxos saudables.
Esta ensalada rusa recibe o seu nome polo chef belga Lucien Olivier, quen a creou a mediados do século XIX para servir no seu restaurante de Moscova. A tradición fixo que a receita se popularizase na cociña de diversos países, coñecida tanto coa denominación Olivier como a de ensalada rusa.
Para preparar unha deliciosa Ensalada Olivier con ventrecha de bonito do norte Pescamar usaremos os seguintes ingredientes (para 4 persoas):
- 2 latas de ventrecha de bonito do norte gourmet Pescamar
- 4 patacas
- 2 cenorias
- 100 gramos de chícharos
- 4 ovos
- 100 gramos de taquiños de xamón cocido ou pavo
- 6 cogombros agridoces (opcional)
- Maionesa
- Sal e pementa negra
Elaboración:
Cocemos en auga con sal as cenorias e as patacas cortadas en dados pequenos, e os chícharos. Cando estean feitos, retiramos a un bol e deixamos arrefriar.
Á parte, cocemos os ovos. Deixamos arrefriar, pelamos e picamos ben. Reservamos sobre unha cuarta parte para decorar e o resto engadímolo no bol anterior.
Escurrimos e cortamos finos os cogombros e incorporámolos ao bol.
A continuación, agregamos os taquiños de xamón cocido e a ventrecha de bonito do norte gourmet Pescamar, da que reservamos o líquido.
Engadimos unhas 4 culleradas de maionesa, suficiente para que se liguen ben todos os ingredientes, aínda que, se se desexa, pódese pór máis cantidade.
Salpementamos e mesturamos ben.
Servimos nunha bandexa na que colocaremos a ensalada dentro dun aro de empratar.
Retiramos o aro e regamos lixeiramente con parte do líquido que reservaramos das latas. Decoramos con ovo picado.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.
